លោកនាយករដ្ឋមន្ត្រី ហ៊ុន ម៉ាណែត បានជំរុញក្រសួងអធិការកិច្ចពន្លឿនការរៀបចំច្បាប់ស្ដីពីអធិការកិច្ចឱ្យបានរួចរាល់នៅក្នុងឆ្នាំនេះ ព្រោះវាជាច្បាប់គោលសម្រាប់មន្ត្រីជំនាញអធិការកិច្ចរបស់ក្រសួងស្ថាប័នយកទៅអនុវត្ត ដើម្បីបង្កើនប្រសិទ្ធភាពការងារ។
លោកនាយករដ្ឋមន្ត្រី ហ៊ុន ម៉ាណែត ពីម្សិលមិញបានអញ្ជើញបិទសន្និបាតបូកសរុបលទ្ធការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងអធិការកិច្ច។
លោកថ្លែងថា រដ្ឋាភិបាលបានកំណត់យកឆ្នាំនេះ ជាឆ្នាំពង្រឹងស្ថាប័នរដ្ឋទាំងអស់តាមរយៈកំណែទម្រង់រចនាសម្ព័ន្ធផ្ទៃក្នុងរបស់ខ្លួនលើតួនាទី ភារកិច្ច និងយន្តការរបស់រដ្ឋាភិបាលក្នុងក្របខណ្ឌអន្តរជាតិក្រសួង ដើម្បីប្រសិទ្ធភាពនៃការអនុវត្តការងារ។
លោកថា កិច្ចការអធិការកិច្ច ជាកិច្ចការសំខាន់។ វាជាយន្តការអធិការកិច្ចរបស់រដ្ឋាភិបាលសម្រាប់ការតាមដាន ត្រួតពិនិត្យ និងវាយតម្លៃក្រសួងស្ថាប័ននីមួយៗ ដើម្បីធានាប្រសិទ្ធភាពការងារ។ ដូច្នេះការពង្រឹងអធិការកិច្ច ជាកិច្ចការចាំបាច់សម្រាប់ការសម្រេចអភិក្រម ដែលជាស្នូលរបស់រដ្ឋាភិបាលធានាប្រសិទ្ធភាព ស្អាតស្អំ និងភាពជឿទុកចិត្ត។
លោកប្រាប់ក្រសួងស្ថាប័នទាំងអស់កុំចាត់ទុកការងារអធិការកិច្ចជាការងារចុះចាប់កំហុស។ កិច្ចការងារសវនកម្មនិងអធិការកិច្ច ជាការចាំបាច់ណាស់សម្រាប់ការបង្កើនប្រសិទ្ធភាពការងារ។ ជាទូទៅ កិច្ចការងារនេះត្រូវចុះស្រាវជ្រាវដើម្បីកែលម្អស្ថាប័ន។
លោកបញ្ជាក់ថា បច្ចុប្បន្នមានអាជ្ញាធរសវនកម្ម ក្រសួងសេដ្ឋកិច្ចនិងហិរញ្ញវត្ថុ ក្រសួងអធិការកិច្ច និងក្រសួងមុខងារសាធារណៈ ជាស្ថាប័នថ្នាក់ជាតិដែលមានសិទ្ធិធ្វើសវនកម្មនិងអធិការកិច្ចលើគ្រប់ក្រសួងស្ថាប័នថ្នាក់ជាតិនិងថ្នាក់ក្រោមជាតិ។
លោកថា នៅពេលដែលស្ថាប័នធ្វើសវនាកម្មនិងអធិការកិច្ចមានសហការគ្នាបានល្អ គឺអាចជួយរៀបចំជាស្ដង់ដាសម្រាប់ការអនុវត្ត។
លោកបន្ថែមថា កិច្ចការអធិការកិច្ចមានភាពស្មុគស្មាញ ដែលទាមទារការកសាងសមត្ថភាពនិងលក្ខណសម្បត្តិចំនួនបី គឺត្រូវការធនធានមនុស្សប្រកបដោយគុណភាព របៀបរបបអនុវត្តការងារ និងបទដ្ឋានគតិយុត្តិ។
លោកបានណែនាំដល់ក្រសួងអធិការកិច្ចបង្កើតយន្តការតាមដាន ត្រួតពិនិត្យ និងវាយតម្លៃតាមរយៈការធ្វើអធិការកិច្ចនិងការធ្វើសនវកម្មផ្សេងៗនៅតាមក្រសួងស្ថាប័ន ប៉ុន្តែក៏ត្រូវត្រួតពិនិត្យឡើងវិញចំពោះយន្តការអនុវត្តអធិការកិច្ចកុំឱ្យជាន់តួនាទីនិងភារកិច្ចគ្នា។
លោកនិយាយថា៖ «ខ្ញុំណែនាំក្រសួងអធិការកិច្ចត្រូវជំរុញច្បាប់អធិការកិច្ចចេញឱ្យបានលឿននៅឆ្នាំ២០២៤នេះ ដើម្បីយកច្បាប់នេះធ្វើជាគោលសម្រាប់ជំនាញយកទៅអនុវត្តការងារ ព្រោះជំនាញអធិការកិច្ចរបស់យើងតាមក្រសួងស្ថាប័នមិនមានអ្វីជាគោលរួមទេ។ ពួកគាត់អនុវត្តដោយផ្អែកតាមជំនាញរៀងៗខ្លួន ហើយអនុវត្តទាំងភិតភ័យ ព្រោះមិនមានអ្វីជាគោល»។
លោកជឿជាក់ថា៖ «ក្រោយពីច្បាប់នេះចេញជារូបរាង គឺអាចដោះស្រាយបញ្ហារដ្ឋាភិបាលបានច្រើន មិនថាការបែងចែកតួនាទី ភារកិច្ច និងការកំណត់ទិសដៅផ្សេងៗ»។
លោករំពឹងថា នៅឆ្នាំនេះប្រព័ន្ធរដ្ឋបាលរបស់រដ្ឋមិនផ្អែកលើបុគ្គលទៀតទេ គឺផ្អែកលើប្រព័ន្ធការងាដែលមានស្តង់ដារប្រតិបត្តិមួយដែលមានការឯកភាពគ្នាទៅលើច្បាប់និងផ្អែកទៅលើបទដ្ឋានការងារដែលមាននិរន្តរភាព។
ក្រសួងអធិការកិច្ចបង្កើតឡើងដើម្បីតាមដានការអនុវត្តការងារ និងច្បាប់នានា ជាពិសេសការលុបបំបាត់ការកិបកេងថវិកានិងទ្រព្យសម្បត្តិរដ្ឋ រួមទាំងអំពើពុករលួយជាដើម។
លោក ណុប ចាន់ណារិន្ទ អ្នកនាំពាក្យក្រសួងអធិការកិច្ចមិនអាចស្នើសុំការបញ្ជាក់បានទេពីម្សិលមិញ ដោយគាត់និយាយថាកំពុងជាប់រវល់ការងារបន្ទាន់។
លោក ហួត ហាក់ រដ្ឋមន្រ្តីក្រសួងអធិការកិច្ចបានថ្លែងក្នុងពិធីបិទសន្និបាតបូកសរុបលទ្ធការងារពីម្សិលមិញថា មេដឹកនាំតាមក្រសួងនិងអង្គភាពមួយបានលាក់បាំងការពិតចំពោះរដ្ឋាភិបាល ជាពិសេសពួកគេស្វែងរកអន្តរាគមន៍នានាពីថ្នាក់ដឹកនាំជាន់ខ្ពស់ដែលមានអំណាចនៅពេលពួកគេត្រូវរងការធ្វើអធិការកិច្ច។
លោកថា៖ «អង្គសន្និបាតបានលើកឡើងពីបញ្ហាប្រឈមដែលក្នុងចំណោមនោះពាក់ព័ន្ធនឹងទស្សនៈខុសឆ្គងមួយចំនួនលើការងារអធិការកិច្ច ដែលក្រុមការងាររងការអធិការកិច្ចយល់ដោយភ័ន្តច្រឡំថាការធ្វើអធិការកិច្ច ទី១ចាំតែចាប់កំហុស ទី២ជ្រៀតជ្រែកចូលកិច្ចការផ្ទៃក្នុងរបស់អង្គភាពខ្លួន ទី៣ធ្វើឱ្យបែកបាក់សាមគ្គីភាពផ្ទៃក្នុង និងទី៤ធ្វើឱ្យរំខានដល់ការងាររបស់អង្គភាព»។
លោកសង្កត់ធ្ងន់ថា ការងារអធិការកិច្ចរបស់ក្រសួងរយៈពេលមួយឆ្នាំមកនេះបានជួយកែតម្រូវនិងផ្លាស់ប្តូរឥរិយាបថមន្រ្តីសាធារណៈមួយចំនួនដែលពុំទាន់អនុវត្តតួនាទីនិងភារកិច្ចបានល្អ។ លើសពីនេះ ក្រសួងបានដាស់តឿននិងក្រើនរំលឹកពួកគេឱ្យប្រុងប្រយ័ត្នខ្ពស់និងការទទួលខុសត្រូវប្រកបដោយមនសិកានិងវិជ្ជាជីវៈ។
លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតនិងការស្រាវជ្រាវ យល់ឃើញថា ការមានច្បាប់ជាគោលសម្រាប់ក្រសួងស្ថាប័នអនុវត្តជារួម នោះការអនុវត្តការងារនឹងដំណើរការដោយរលូននិងមិនមានបញ្ហាប៉ះពាល់អ្វីទេ។
លោកថា ការអនុវត្តការងារជាទូទៅ គឺផ្ដោតសំខាន់លើឆន្ទៈ ហើយនិងការសម្រេចចិត្តរបស់មេដឹកនាំហ៊ានបង្ហាញលទ្ធផលពិតជាសាធារណៈក្នុងកម្រិតណាចំពោះការធ្វើអធិការកិច្ចរកឃើញមន្ត្រីរបស់ខ្លួនបានប្រព្រឹត្តខុសឆ្គង។
លោកនិយាយថា៖ «ប្រសិនបើការបង្ហាញជាសាធារណៈធ្វើឱ្យប៉ះពាល់ដល់រូបភាពនៃការដឹកនាំរបស់គាត់ នៅពេលមន្ត្រីរបស់គាត់មានបញ្ហា ហើយគាត់មិនហ៊ានដោះស្រាយមិនហ៊ានដោះស្រាយ ជារឿងមួយដែលយើងពិបាតនឹងវាយតម្លៃណាស់ ព្រោះក្នុងការអនុត្តកន្លងមក គឺរដ្ឋាបាលខ្លាចប៉ះពាល់ឬខូចមុខមាត់នៅពេលញគេរកឃើញមន្ត្រីរបស់គាត់មានកំហុសឆ្គងក្នុងការអនុវត្តច្បាប់និងការងារ»។
លោកបន្ថែមថា៖ «យើងគួរអនុវត្តដោយតម្លាភាព យុត្តិធម៌ ហើយយើងផ្សព្វផ្សាយអំពីលទ្ធផលជាក់ស្ដែងដែលបានរកឃើញពាក់ព័ន្ធនឹងអំពើអសកម្ម ឬក៏អំពើណាមួយដែលធ្វើឱ្យប៉ះពាល់ការអនុវត្តច្បាប់។ ដូច្នេះយើងគិតថាការតាំងចិត្តដាក់ចេញនូវគោលការណ៍ដាច់ណាត់ដោយមិនភ័យក្នុងការលុបបំបាត់ចោលភាពអវិជ្ជមានរបស់មន្ត្រី គឺយើងអនុវត្តបាន»។
លោកបានបន្តថា លោកគ្មានទំនុកចិត្តខ្ពស់ទេចំពោះការបើកទូលាយលើការអនុវត្ត ក៏ដូចជាការប្រកាសលទ្ធផលក្រោយការស៊ើបអង្កេតឬធ្វើអធិការកិច្ចរកឃើញ៕
Related Posts
February 3, 2024- February 3, 2024
- September 5, 2023
February 3, 2024
