ការនាំចេញសម្លៀកបំពាក់ ស្បែកជើង និងផលិតផលធ្វើដំណើរបានកើនឡើង ២១,៦៤ ភាគរយនៅក្នុងខែមករាឆ្នាំនេះ ដែលរកចំណូលបាន ៩៦៧ លានដុល្លារសម្រាប់វិស័យនេះ បន្ទាប់ពីបានធ្លាក់ចុះភាគច្រើនកាលពីឆ្នាំមុន។ ការផ្លាស់ប្តូរនេះបាននាំមកនូវការសាទរដល់វិស័យដ៏សំខាន់នៃសេដ្ឋកិច្ចកម្ពុជាដែលផ្តល់ការងារដល់ប្រជាជនជិតមួយលាននាក់។
យោងតាមទិន្នន័យពាណិជ្ជកម្មចុងក្រោយបំផុតដែលចេញផ្សាយដោយអគ្គនាយកដ្ឋានគយ និងរដ្ឋាករ កាលពីថ្ងៃចន្ទ បានឱ្យដឹងថា គ្រប់ផ្នែកដែលស្ថិតនៅក្រោមវិស័យសម្លៀកបំពាក់ ស្បែកជើង និងផលិតផលធ្វើដំណើរ(GFT) ដំណើរការបានល្អក្នុងខែមករា ឆ្នាំ២០២៤ ដោយបង្កើនចំណូលនាំចេញ បើធៀបនឹងខែដូចគ្នាកាលពីឆ្នាំមុន។
ក្រៅពីនេះ ការនាំចេញសម្លៀកបំពាក់ប៉ាក់ និងគ្រឿងសម្លៀកបំពាក់ទទួលបានចំណូល៤៣៥ លានដុល្លារ កើនឡើង ២៤,៣ ភាគរយ បើធៀបនឹងខែមករា ឆ្នាំ២០២៣។ សំលៀកបំពាក់មិនប៉ាក់ ទទួលបានចំណូល ២៦៩លានដុល្លារ ជាមួយនឹងកំណើន ៣០,៩ ភាគរយ ធៀបនឹងរយៈពេលមួយឆ្នាំ។
ការនាំចេញស្បែកជើង ទទួលបានចំណូល ១២២ លានដុល្លារកាលពីខែមុន កើនឡើង ១១,៤ ភាគរយធៀបនឹងខែមករា ឆ្នាំ២០២៣ និងផលិតផលធ្វើពីស្បែក និងផលិតផលធ្វើដំណើរ ទទួលបាន១២២ លានដុល្លារជាមួយនឹងកំណើន ៤,១ ភាគរយក្នុងរយៈពេលដូចគ្នានេះ។
ផលិតផលវាយនភ័ណ្ឌដែលផលិតឡើង(made-up textile articles)ផ្សេងទៀត ទទួលបានចំណូល ១៨,២២៧ ដុល្លារក្នុងខែមករា ឆ្នាំ២០២៤កើនឡើង៤៨,១ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
គួរកត់សម្គាល់ផងដែរថា កម្ពុជាអាចសម្រេចបាននូវកំណើននៃការនាំចេញនេះ បើទោះបីជាមានរបាំងពាណិជ្ជកម្ម ដូចជាការមិនបន្តប្រព័ន្ធអនុគ្រោះពន្ធទូទៅ (GSP) ដោយសហរដ្ឋអាមេរិក និងការកាត់បន្ថយជិត ២០ ភាគរយនៃប្រព័ន្ធអនុគ្រោះពន្ធអ្វីគ្រប់យ៉ាងលើកលែងតែអាវុធ (EBA) ដោយ សហភាពអឺរ៉ុប (EU) ដែលជាទីផ្សារធំបំផុតពីរសម្រាប់ទំនិញ GFT ។
វិស័យ GFT គឺជាអ្នកបង្កើតការងារដ៏ធំបំផុតមួយនៅក្នុងប្រទេស ហើយបានបង្កើតការងារផ្ទាល់ជិតមួយលានកន្លែង នេះបើយោងតាមអង្គការពលកម្មអន្តរជាតិ (ILO)។ វិស័យនេះមានចំនួន ១១ ភាគរយនៃសេដ្ឋកិច្ច ហើយបានរួមចំណែកប្រហែល ៥០ ភាគរយនៃកំណើន GDP ពិតប្រាកដរបស់កម្ពុជា តាមការព្យាករណ៍របស់ខ្លួនក្នុងឆ្នាំ២០២១។
គេសង្ឃឹមផងដែរថាការផ្លាស់ប្តូរនៃការនាំចេញ GFT នៅក្នុងខែមករានេះនឹងបន្តរហូតដាច់ឆ្នាំ និងទប់ទល់នឹងការបាត់បង់ការងារ និងការបិទរោងចក្រ។ រដ្ឋាភិបាលកម្ពុជាក្នុងខែមីនា ឆ្នាំ២០២៣ បានចាប់ផ្តើមផ្តល់ប្រាក់ឧបត្ថម្ភចំនួន ៤០ ដុល្លារក្នុងមួយខែដល់កម្មករនិយោជិតម្នាក់ៗក្នុងវិស័យ GFT ដែលកិច្ចសន្យាការងារត្រូវបានព្យួរ បន្ទាប់ពីការធ្លាក់ចុះនៃតម្រូវការសកល។
គេអាចចាំបានថា ការនាំចេញ GFT របស់កម្ពុជាបានធ្លាក់ចុះ ១៣,៣១ ភាគរយក្នុងឆ្នាំ២០២៣ ចំពេលមានបញ្ហាប្រឈមជាសកល ពី ១២,៨០ ប៊ីលានដុល្លារដែលទទួលបានក្នុងឆ្នាំ២០២២ ដល់ ១១,០៩ប៊ីលានដុល្លារ ដែលនាំទៅដល់ការព្យួរការងាររបស់កម្មករនិយោជិតរោងចក្រជាច្រើន។
ការធ្លាក់ចុះនៃការនាំចេញទំនិញ GFT ដែលបានចាប់ផ្តើមនៅពាក់កណ្តាលឆ្នាំ២០២២ បានបន្តកាលពីឆ្នាំមុនផងដែរ សូម្បីតែវិស័យផ្សេងទៀតស្ទើរតែទាំងអស់បានចុះបញ្ជីកំណើននៃការនាំចេញនៅឆ្នាំ២០២៣។ ការធ្លាក់ចុះនៃការនាំចេញទំនិញ GFT ក្នុងឆ្នាំ២០២៣ ក៏បានបណ្តាលឱ្យមានការអំពាវនាវពីអ្នកជំនាញដើម្បីកាត់បន្ថយ ការពឹងផ្អែកខ្លាំងពេកលើវិស័យនេះ និងការធ្វើពិពិធកម្មនៃការនាំចេញ ដោយលើកទឹកចិត្តដល់វិស័យផ្សេងទៀតផងដែរ។
ការពឹងផ្អែករបស់ប្រទេសលើវិស័យ GFT ដែលជាអ្នករួមចំណែកចម្បងដល់កំណើនសេដ្ឋកិច្ច ក៏ដូចជាប្រាក់ចំណូលគ្រួសារឯកជន មានន័យថាការធ្លាក់ចុះណាមួយនៃការនាំចេញ GFT ទំនងជាមានផលប៉ះពាល់យ៉ាងខ្លាំង។
ទន្ទឹមនឹងនោះ កម្ពុជាកំពុងប្រឈមមុខនឹងការប្រកួតប្រជែងខ្លាំងពីបណ្តាប្រទេសអាស៊ីផ្សេងទៀត ដូចជាប្រទេសបង់ក្លាដែស ក្នុងវិស័យ GFT ជាដើម។ ប្រទេសបង់ក្លាដែសបានបង្កើនការនាំចេញសម្លៀកបំពាក់របស់ខ្លួនចំនួន ១០ ភាគរយក្នុងឆ្នាំ២០២៣ ដល់កម្រិតខ្ពស់បំផុតចំនួន ៤៧ប៊ីលានដុល្លារ ដែលស្មើនឹង ៤ ដងនៃការនាំចេញរបស់ប្រទេសកម្ពុជា។
នេះក៏មានការអំពាវនាវឲ្យមានការអភិវឌ្ឍជំនាញក្នុងវិស័យនេះ ក្នុងប្រទេសកម្ពុជា ដើម្បីបង្កើនផលិតភាពរបស់កម្មករ។ លើសពីនេះ វាគួរតែអនុវត្តវិធានការសន្សំសំចៃ(cost-effective measures) ដូចជាការលើកកម្ពស់ប្រភពថាមពលកកើតឡើងវិញ រួមទាំងពន្លឺព្រះអាទិត្យ ដើម្បីដណ្តើមបានការប្រកួតប្រជែង។
ដោយបានផ្តល់សម្ភាសន៍ជាមួយកាសែតខ្មែរថាមស៍ កាលពីពេលថ្មីៗនេះ លោក Massimiliano Tropeanoអ្នកជំនាញសំលៀកបំពាក់ និងចីរភាព នៃសភាពាណិជ្ជកម្មអឺរ៉ុបនៅកម្ពុជា (EuroCham) បានគូសបញ្ជាក់អំពីតម្រូវការសម្រាប់វិស័យ GFT របស់កម្ពុជា ដើម្បីបង្កើនការប្រកួតប្រជែងរបស់ខ្លួន។
គាត់បានឱ្យដឹងថា ការមានបទប្បញ្ញត្តិជាបណ្តើរៗ និងពន្ធលើការដំឡើងបន្ទះស្រូបពន្លឺព្រះអាទិត្យនឹងអាចឱ្យវិស័យនេះកាន់តែមានភាពប្រកួតប្រជែង ហើយថែមទាំងជួយជួលកម្មករកាន់តែច្រើន និងទទួលបានប្រាក់ចំណូលកាន់តែច្រើនសម្រាប់ប្រទេស។