រដ្ឋាភិបាលកម្ពុជាកំពុងរៀបចំគោលនយោបាយបង្កើតតំបន់សេដ្ឋកិច្ចពិសេសកម្ពុជា-ជប៉ុន ដើម្បីទាក់ទាញការវិនិយោគផ្ទាល់ពីប្រទេសជប៉ុនបន្ថែមទៀត។
កិច្ចប្រជុំអន្តរក្រសួងមួយត្រូវបានរៀបចំឡើងកាលពីថ្ងៃចន្ទ ដើម្បីពិភាក្សានិងរៀបចំឯកសារទស្សនទានសម្រាប់ការបង្កើតតំបន់សេដ្ឋកិច្ចពិសេសនៅកម្ពុជា។
កិច្ចប្រជុំនេះ ដឹកនាំដោយលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ដោយមានការចូលរួមពីមន្ត្រីជាន់ខ្ពស់ ដូចជា លោក កែវ រតនៈ រដ្ឋមន្ត្រីក្រសួងរ៉ែ និងថាមពល លោក ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងលោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងអ្នកពាក់ព័ន្ធផ្សេងទៀត។
កិច្ចប្រជុំបានពិភាក្សាលើការរៀបចំឯកសារទស្សនទានសម្រាប់បង្កើតតំបន់សេដ្ឋកិច្ចពិសេសកម្ពុជា-ជប៉ុនដើម្បីជំរុញឱ្យធុរកិច្ចជប៉ុនកាន់តែច្រើនមកវិនិយោគនៅកម្ពុជា»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ខ្មែរថាមស៍ថា “តំបន់សេដ្ឋកិច្ចពិសេសកម្ពុជា-ជប៉ុន នឹងផ្តល់អត្ថប្រយោជន៍ជាច្រើនដល់កម្ពុជា ហើយនឹងទាក់ទាញអ្នកវិនិយោគជប៉ុនកាន់តែច្រើនមកកម្ពុជា ដោយសារយើងមានទីផ្សារដ៏ធំនៅក្រោមកិច្ចព្រមព្រៀងពាណិជ្ជកម្ម និងកិច្ចព្រមព្រៀងRCEP ដែលនឹងបង្កើតការងារ និងកសាងសមត្ថភាពដល់កម្មករក្នុងស្រុក” ។
គម្រោងតំបន់សេដ្ឋកិច្ចពិសេសកម្ពុជា-ជប៉ុនត្រូវបានពន្លឿន និងអនុវត្តស្របតាមគំនិតផ្តួចផ្តើមដែលស្នើឡើងដោយឯកឧត្តមបណ្ឌិតនាយករដ្ឋមន្ត្រី ហ៊ុន ម៉ាណែត ក្នុងដំណើរបំពេញទស្សនកិច្ចនៅប្រទេសជប៉ុនក្នុងខែធ្នូ ឆ្នាំ២០២៣។
ក្នុងដំណើរបំពេញទស្សនកិច្ចផ្លូវការនៅប្រទេសជប៉ុន ឯកឧត្តមបណ្ឌិតនាយករដ្ឋមន្ត្រីបានស្នើឱ្យអ្នកវិនិយោគ ជប៉ុនពិចារណាលើការវិនិយោគនៅកម្ពុជា ជាពិសេសនៅក្នុងតំបន់សេដ្ឋកិច្ចពិសេសដែលនឹងត្រូវបង្កើតក្នុងពេលឆាប់ៗនេះ។
ប្រទេសជប៉ុនគឺជាអ្នកវិនិយោគ និងដៃគូពាណិជ្ជកម្មបរទេសដ៏ធំបំផុតមួយរបស់កម្ពុជា។
ការវិនិយោគរបស់ជប៉ុននៅកម្ពុជាបច្ចុប្បន្នរួមមានគម្រោងដូចជា Minebea (Cambodia) Co Ltd, រោងចក្រគ្រឿងទំនើបៗ រោងចក្រដំឡើងរថយន្ត ផ្សារទំនើបអ៊ីអន និងគំគម្រោងក្នុងវិស័យកសិកម្ម ផ្សេងទៀត។
គម្រោងតំបន់សេដ្ឋកិច្ចពិសេសត្រូវបានលើកឡើងក្នុងកិច្ចប្រជុំនៅថ្ងៃទី ២៥ ខែធ្នូ រវាងក្រុមប្រឹក្សាអភិវឌ្ឍន៍កម្ពុជា និងលោក Ueno Atsushiឯកអគ្គរដ្ឋទូតជប៉ុនប្រចាំកម្ពុជា ។ នេះក៏ស្របនឹងការប្រកាសរបស់ឯកឧត្តមបណ្ឌិតនាយករដ្ឋមន្ត្រី ហ៊ុន ម៉ាណែត កាលពីពេលថ្មីៗនេះដែរ ។
ឯកឧត្តមបណ្ឌិតបានមានប្រសាសន៍កាលពីថ្ងៃទី៣១ ខែមករាឆ្នាំ២០២៤ ក្នុងពិធីដាក់អោយប្រើប្រាស់ជាផ្លូវការនូវកម្មវិធីពិសេសដើម្បីជំរុញការវិនិយោគនៅខេត្តព្រះសីហនុថា កម្ពុជាកំពុងពិចារណាបង្កើតតំបន់សេដ្ឋកិច្ចពិសេសជាមួយប្រទេសនានា។
ឯកឧត្តមបណ្ឌិតបានបន្ថែមថា កម្ពុជាកំពុងសិក្សា និងរៀបចំតំបន់សេដ្ឋកិច្ចពិសេសសម្រាប់អ្នកវិនិយោគដែលមកពីប្រទេសតែមួយ ដោយបង្ហាញពីគំរូផ្សេងគ្នាចំពោះតំបន់សេដ្ឋកិច្ចពិសេសដែលមានស្រាប់ដែលមានអ្នកវិនិយោគមកពីប្រទេសផ្សេងៗគ្នា។
ឯកឧត្តមបណ្ឌិតបានគូសបញ្ជាក់ទៀតថា “យើងកំពុងបង្កើតគោលនយោបាយ និងអនុវត្តគម្រោងសាកល្បងនៅក្នុងតំបន់សេដ្ឋកិច្ច។ គំរូថ្មីនឹងបំពេញបន្ថែមរបស់ដែលមានស្រាប់ មិនមែនជាការជំនួសឬប្រកួតប្រជែងជាមួយពួកគេឡើយ»។
លោក ហេង វណ្ណឌី ក៏បានបញ្ជាក់ផងដែរអំពីសារៈសំខាន់នៃការបណ្តុះបណ្តាលបច្ចេកទេសដើម្បីបង្កើនសម្ថភាពកម្មករជំនាញសម្រាប់គាំទ្រគម្រោងវិនិយោគបច្ចេកវិទ្យាខ្ពស់ដូចជាក្រុមហ៊ុនMinebea (Cambodia) ដែលបានបង្កើតឡើងនៅក្នុងតំបន់សេដ្ឋកិច្ចពិសេសភ្នំពេញ។
លោកបានបន្ថែមថា “យើងគួរតែបង្កើនការបណ្តុះបណ្តាលជំនាញ ដើម្បីបង្កើនចំនួនកម្មករជំនាញ ដើម្បីគាំទ្រការវិនិយោគជាមួយបច្ចេកវិទ្យាកម្រិតខ្ពស់ ដែលជាវិស័យសក្តានុពលមួយក្នុងការទាក់ទាញអ្នកវិនិយោគកាន់តែច្រើនមកកម្ពុជា”។
ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគរបស់ជប៉ុនចំនួន១៤៩ ដែលមានដើមទុនសរុបប្រហែល ២,៩ ពាន់លានដុល្លារគិតត្រឹមខែសីហា ឆ្នាំ២០២២ ដោយការវិនិយោគភាគច្រើនលើសម្លៀកបំពាក់ ស្បែកជើង ទំនិញធ្វើដំណើរ គ្រឿងបន្លាស់រថយន្ត គ្រឿងអេឡិចត្រូនិច សំបកកង់រថយន្ត គ្រឿងបន្លាស់រថយន្ត បន្ទះស្រូបពន្លឺព្រះអាទិត្យ និងឧស្សាហកម្មដំឡើងកង់។
ទិន្នន័យពីអគ្គនាយកដ្ឋានគយ និងរដ្ឋាករបានបង្ហាញថា ក្នុងឆ្នាំ២០២៣ ពាណិជ្ជកម្មរវាងប្រទេសទាំងពីរមានចំនួន ១,៨ ពាន់លានដុល្លារ ធ្លាក់ចុះ ៧,២ ភាគរយពីចំនួន ១,៩៤ ពាន់លានដុល្លារដែលបានកត់ត្រាក្នុងឆ្នាំ ២០២២។
ការនាំចេញទៅកាន់ប្រទេសជប៉ុនមានចំនួន ១,១៧ពាន់លានដុល្លារក្នុងឆ្នាំ២០២៣កើនឡើង ០,២ភាគរយ ខណៈដែលការនាំចូលពីប្រទេសជប៉ុនមានចំនួន ៦២៣លានដុល្លារ ធ្លាក់ចុះ ១៨,៥ភាគរយ។